السبت , 10 ديسمبر 2016

نصائح هامة للتخسيس

مدونة الشرقاوي

دايت – رجيم – تخسيس

دي نصائح سريعة للتخسيس ممكن تعتمدها في حياتك اليومية و تخليها لايف ستايل عشان تبني جسم صحي بوزن صحي حتي لو مش بتتمرن بانتظام.
ابدأ يومك دايما بكوب مياة و يستحسن لو عليها نص ليمونة.
1-اشرب في اليوم مش اقل من 8 كوبايات مياة او 2 لتر (على الاقل).
2-اشرب 2 كوب شاى اخضر او قهوة خضراء او مرمية يوميا.
3-اشرب مشروب الاعشاب قبل الوجبات (جنزبيل+قرفة+كمون+ليمون) عشان يحسن من عملية الحرق.
4-قلل الدهون خالص و استعمل زيت الزيتون و زيت بذر الكتان (الزيت الحار).
5-قلل السكريات و الحلويات و النشويات و الدقيق في استهلاكك اليومي.
6-كتر من البروتين زي البيض و اللحمة و الفراخ المشوية و الزبادي و اللبن الخالي الدسم و الجبنة القريش و الفول و العدس و الترمس.
7-كٌل فاكهة و خضار كتير على مدار اليوم.
8-استخدم خل التفاح و الكركم في اكلك عشان ليهم فوايد صحية كثيرة.
9-كٌل شوفان و بذر كتان على الزبادي او اللبن الخالي الدسم و لو بتتمرن زود جنين القمح عشان غني بالبروتين و الكربوهيدرات و الالياف و الاوميجا 3 & 6.
10-اخر وجبة دسمة تكون الساعة 8 بليل بعد كده ممكن تاكل زبادي او تشرب لبن.
11-امشي كل يوم على الاقل ربع ساعة او اركب عجل او امشي علي مشاية المهم تعمل مجهود يومي.
12-لو عندك دامبلز اعمل تمرينات خفيفة في البيت عشان تحافظ و تبني الكتلة العضلية و تساعد على الحرق.
13-استبدل السكر العادي بسكر الدايت (الخالي من الأسبرتام) او تقلل استهلاكك من السكر الابيض و تستبدله بالعسل الابيض مش اكتر من 3 معالق صغيرة في اليوم.
14-كٌل ثمرة خضار او فاكهة او علبة زبادي او فشار بين الوجبات كسناك خفيف المهم ماتجوعش نفسك.
15-لازم تاكل سلطة خضراء يومية فيها المكونات الاساسية زي الخيار و الطماطم و الجزر و الفلفل الرومي و الاوراق الخضراء زي البقدونس و الكرفس.
16-بلاش تاكل قدام الكمبيوتر او التليفزيون.
17-خالي بالك من الأكل الانفعالي يعني لما تبقى مكتئب تاكل .. اعمل حاجة تانية تخرج بيها من اكتئابك و حزنك.
18-كل ماتحس بالجوع اشرب كوب مياة.
19-خالي حد من افراد اسرتك او اصدقائك القريبين يمشي معاك في الدايت او اسلوب الحياة ده عشان يشجعك و محدش يحبطك.
20-ابعد عن المياة الغازية و الوجبات السريعة و المٌعلبات و الحلويات الشرقية و الشوكلاتة.
21-اوزن نفسك مرة في الاسبوع في نفس اليوم الصبح.
22-المكسرات ليها فوايد كتير جدا بس برضو الإكثار منها هيتخن, كٌل مكسرات بس قليل.
23-كٌل 3 مرات سمك او تونة او ماكريل او سردين في الاسبوع.
24-كٌل الارز او المكرونة مسلوقين و في حدود 4 معالق.
25-آخر حاجة تاكلها في اليوم علبة زبادي + قرفة + نصف ليمونة.
26-مافيش مانع يوم في الاسبوع تاكل فيه حاجة نفسك فيها بس بلاش تفتري.
27-جرب تشرب مشروب الديتوكس زي (مياة+شرائح خيار+شرائح ليمون+اوراق نعناع) او (شرائح برتقال+شرائح ليمون+شرائح جريب فروت).
28-ممكن تكتب انت بتاكل ايه خلال اليوم لو ماشي على نظام السعرات.
29-اعمل لنفسك هدف يعني حدد انت عايز تخس كام كيلو في الشهر او اتحدي نفسك انك تبدا تعيش حياة صحية وخفيفة.

آخر نصيحة, لو حد انتقدك و قلك مش هتخس و كٌل زي ما الناس بتاكل اي عك قوله: خليك في حالك.

نصائح هامة للتخسيس

 

 

 

عن الشرقاوي

تعليق واحد

  1. بارك الله فيكم وفي علمكم وعملكم

اترك رد

%d مدونون معجبون بهذه: